Le poesie di Gioacchino Vilei in dialetto salentino

Ciao amici ed amiche,
queste poesie non sono state scritte nè da un poeta nè da uno scrittore,ma da una persona come voi che ha voluto mettere per iscritto quanto l'ha colpito nella sua fanciullezza nel suo paese natio,Giurdignano:persone,cose,modi di fare,usanze e costumi.
La raccolta è del 1991,in dialetto Giurdignanese.
Ho dedicato questa raccolta alle mie figlie,Annalisa,Silvia,Stefania,a mia madre e a tutti gli amici di quei tempi,i meravigliosi anni 60.



NATALE
(dedicata alle mie figlie:Annalisa-Silvia-Stefania)

Fije mei,
lu Natale de tanti anni rretu
quannu iou eru piccinnu comu ui
nautra cosa era.
Nove giurni prima de Natale,
la nuvena ncuminciava
e lu papà osciu
la mmane mprima se zava
e poi tuttu nsunnatu
alla chiesa rriava.
Tu scendi dalle stelle
se cantava e
aria de festa se sintia.

Alla scola poi,
la letterina de Natale se scrivia
e la recita e la poesia se mparava.
La notte de natale,
tutti riuniti nanzi lu cantune
le mengule se cazzaune
e a "chirifì chirifò sciucaune.

Lu giurnu de Natale
cullu vestitu nou
a missa sciane.
A menzatie
la letterina de natale sutta
lu piattu de patrima mintia,
li sordi spittava
ca li simenti e li lupini
mera ccattare.

Tante belle cose se mangiaune
ma specialmente le pittule
le cartidrhate e li cunfritti cullu mele.
Nun c'erene tutti li regali de moi
ca tiniti ui a Natale
sutta l'albero:sia ca li regali
se faciune alla festa
della befana,sia ca
nun c'erene li sordi de moi.

Quistu era lu Natale
de lu papà osciu,poveru ma bellu:
quannu divintati cranni
cuntatulu alli fiji osci


(commento personale)
Il Natale di oggi è sicuramente diverso, ma forse si son persi i valori cristiani e c'è troppo consumismo.Regali.....regali....regali....forse troppi.




LU FESTIVALLA
(dedicata all'amico Luigi Bruno)

Quanta fatica,quanta pascenza
per fare lu festivalla a Giurdignanu nosciu.

Propriu nu festivalla
alla grande,cullu complessu
antrà lu trappitu;
si,propriu trappitu
trasformatu in teatru.

Nussù chiacchere,ma è veru
sulu ci ha faticatu
lu po sapire.

Nu mese e forse cchiui
lu trappitu a pulizzare ncuminciamme
e a provare le canzuni
cullu complessu "i pipistrelli"

Poi lu palcu,culli banchi
dell'asilu preparamme,
poi tutte le meju tuvaje e
lenzuli de la dote le fimmine
ne pristara.

Era bellu,mutu bellu.
Li cantanti,la giuria,lu presentatore,
lu complessu,la premiazione;propriu comu a Sanremu,
e puru nu picca de invidia e d'emozione
i cantanti tiniane.

E le canzuni ? belle....belle
"bandiera gialla-nessuno mi può giudicare-ban bang-la fisarmonica ecc ecc "

E lu guadagnu ? Mutu,mutu,
appena pe na pizza antrà lu "ziu Cicciu"

E la soddisfazione?
Tanta...tanta...veramente



(Commento personale)
Dopo tanti anni c'è ancora la gente di Giurdignano che ricorda con piacere questo avvenimento,unico soprattutto per quei tempi.Ed è evidente che la cosa non può che farmi piacere.Parliamo del febbraio del 1967.




GIURDIGNANU NOSCIU
(dedicata a fraima lu Ginu)

Giurdignanu nosciu
nunnè grande,ne bellu
ma caratteristicu e
cu tanti monumenti antichi
e tanti bravi cristiani:
li dolmen,li menhir,
centuporte,la chiesa bizantina
e soprattuttu la
culonna de santu Roccu

Moi s'è puru rimodernatu,
culla trattoria degli amici
e lu locale Nostra signora dei turchi.

Giurdignanu nu tene lu mare
ma d'estate tene tanti turisti
Giurdignanesi ca stannu luntani
e tanti cristiani ca venene in vacanza.

E' caratteristicu per le
sue case bianche,basse,e
famosu poi per le feste patronali:
Santu Roccu,San Giuseppe,
la fera della Madonna del Rosario
e tante autre.

Giurdignanu,sij grande!!!!!



(commento personale)
Giurdignano è un piccolo centro ma ricco di storia.Qualcosa l'amministrazione sta valorizzando e spero che continui a farlo col palazzo Baronale e con Centoporte




LA FESTA DE SANTU ROCCU
(dedicata all'amico Pino Corchia)

E' spicciatu lu tiempu
quannu cu tanta ansia
la festa de Santu Roccu se spittava.

Nu mese prima o forse cchiui
la casa se llattava,
poi allu vestitu se pinsava.
Ci putia,tuttu confezionatu
se lu ccattava,ci nu putia
la stoffa allu mercatu se pijava
e lu mesciu ne la cusia.
Se era pussibile puru
le scarpe nove ne ccattaune;
dipinnia se l'annata era bona
e se no quidre de la uttisciana
culla crema ne pulizaune.

Na simana prima ,la parazione rriava
e nui vagnoni ancontru lu carru sciane.
La festa poi se spittava,
anzi la viscilia
ca le barracche riaune e
versu sira sintivi critare:
Lu Costa osciu,belle e caute le nuscedrhe

La sira la processione se facia
lu Sindacu la stola se mintia
e dopu la funzione e lu Te Deum
la serata antrà la Tunata
cu nu pezzettu,menzu quintu
e na gassosa se spicciava.

La mmane de la festa la banda
lu paese era girare
e puru se facia cautu,
nun c'era nienti de fare.
Poi alla missa cantata
tutti erane scire
ca lu panegiricu erene sintire
de nu predicatore vinutu de luntanu
e guai a idrhu se nu parlava de li miraculi
de Santu Roccu e se nu spicciava la predica
culli benedici....benedici...

Spicciata la missa
subitu a casa sciune a mangiare
la pasta cullu sucu,lu lacciu,lu milune,anzi ddoi miluni:
unu de acqua e unu de pane.

La sira tutti cangiati
cullu vestitu nou
le banne se spittaune:
una de na vanna e una de l'autra
percè s'erene ncuntrare a
menzu la chiazza sunannu la
marcia triunfale.

Poi ncuminciava la serata
e le banne se alternaune
a sunare li pezzi d'opera lirica.

Alla fine culli fochi
la festa se spicciava
e stracchi e strutti a
durmire sciune.

Quista era la festa de Santu Roccu
de tanti anni rretu: E Moi?


(commento personale)
La festa di San Rocco resta sempre la grande festa del paese.Personalmente penso che senza cambiare le tradizioni,in qualche modo bisogna trovare delle soluzioni per cambiare qualcosa



UTRANTU MEU
(dedicata a fraima lu Pipii)

Utrantu,si statu sempre bellu
e a mie mutu caru,
sia moi sia quannu eru vagnone;
me sentu na cosa ntra lu core
quannu sentu parlare de tie.

La spiaggia preferita
era la punta.
Certe fiate vinia cu lu trainu
oppuru culla vespa ca tannu
sulu patrima tinia a Giurdignanu.

E poi...lu bagnu...anzi
tanti bagni allu mare piccinnu,
antrà li cuti me facia.
A menzatie poi,propriu sulli cuti
mangiavane la pasta sciutta
ca nerene purtata de casa
e puru lu milune.

Comu era bellu
comu me piacia sciucare
cu fraima lu Pippi e culli
amici mei.

Moi,maggiu fattu cranne
nu te visciu comu prima
percè stau luntanu,
tie si divintatu mpurtante
ma pe mie si sempre comu prima.

Utrantu,puru ca nussù de quai,
nulli face nienti:fane finta ca teni
nu fiju de cchiui.


(commento personale)
Otranto mi è sempre piaciuta e adesso è conosciutissima e ha avuto forse uno sviluppo eccessivo.La spiaggia lascia un pò a desiderare rispetto agli alimini,all'orte ed altro



MAMMA
(dedicata a mia madre)

Poeti,cantanti,scrittori,artisti
tutti hannu scrittu versi insuperabili
pe la mamma.

Iou nu su nienti rispettu a quisti,
ma nu boiu fazzu cattiva ficura
propriu cu signuria,Mamma.

Ce taggiu dire?
tante cose,ma soprattuttu
ca stampi comu lu tou
nun ci ne cchiui.
Sempre disponibile,premurosa,
sicura e curretta cu tutti.

Nu face nienti ca lu Signore
ta date tante sofferenze de ogni tipu:
Signuria si stata sempre cranne e l'hai
superate sempre cu rassegnazione.

Prima de tuttu li fiji toi,poi l'autri
e poi se è statu possibile,hai pinsatu pe Signuria;
ma sta possibilità è rimasta spessu nu sognu.

Mamma moi me manchi tantu a Milanu
ma speru cu tornu quantu prima
a Giurdignanu.

Jou e li fiji toi te dicimu grazie,
Mamma,de quidrhu ca hai fattu pe nui


(commento personale)
Mia mamma è stata la persona più importante della mia vita e anche se son trascorsi 10 anni dalla sua morte mi manca sempre tanto.


L'AMICI MEI
(dedicata al grande amico Donato Accoto)

Naturalmente nu possu
cu ve nominu tutti
ma cu quistu scrittu
oiu cu ve salutu e ringraziu.

Nui meridionali,o comu dicune
a Milanu,nui terroni,simu stati
costretti quasi tutti a
ssire de casa noscia e cusì
nimu persi de vista.

Belli tiempi li nosci
quannu spensierati
ssiune a menzu la chiazza ed
erane li meiu de tutti.

Bastavane cinquecentu lire ppitunu
e allu restu pinsava l'amicu nosciu:
benzina,macchina,pizza,cinema.

Bastava na belvedere o na cinquecentu familiare
cu ne rinnia felici e poi quarche vagnona
alle feste de ballu se truava sempre.

Menzu quintu,na gassosa,do lupini,
quattru chiacchere e cusì passava
la duminica.

A tutti quanti nu salutu sinceru
de namicu sinceru:l'amicu osciu....
u CChinu o comu dicune a Milanu
Gio' o Gion


(commento personale)
Donato è stato e fortunatamente è ancora il mio più caro amico d'infazia .Continuiamo a essere ancora insieme spesso e a divertirci.



LU CHIERICHETTU

Quannu erane vagnoni
più o meno tutti quanti
imu fattu li chierichetti
iou forse cchiui de l'autri
percè su sciutu puru in seminariu.

Comu pariune belli
culla cotta ianca
e comu me piacia quannu
putia fare lu capu chierichettu.
Lu capu chierichettu era quiru
ca purtava l'incensiere.

Iou e l'autri chierichetti
spittaune la duminica percè
lu preite ne tia la mancia.

Poi tutte le vagnone
ne guardaune e viniane nposta
a missa cu ne vitiane.

Dopu la missa,poi,
allu pallone sciucaune e
quarche fiata puru
allu biiardinu.

E moi ?


(commento personale)
Altri tempi quelli del chierichetto.Non c'era l'oratorio come adesso,ma la parrocchia era sempre un punto d'incontro



LE FESTE NOSCE
(dedicata all'amico Salvatore Rizzuni)

Belle erene le feste nosce
chine soprattuttu de masculi
ca le fimmine era difficile
cu viniane tannu.

A casa mia era lu puntu d'incontru
ccattaune l'occorrente
cacciannu tantu a pitunu.

Capudannu era caratteristicu
percè qualche amicu facia sparire
a sjrisa li cunij e poi
mamma Abbondanza li prepararava
culle patate allu tianu.

Famosu poi era divintatu
lu spruzzatore,era n'amicu
ca lu faciune ridere e poi
ne spruzzava tutti culla
ucca china de mieru.

Quannu poi le fimmine
nu viniane alle feste
cu na barzelletta,nu bbhieri de mieru
o de chinottu o rumpinnu bicchieri
se passava lu stessu la serata.

Belle erene le feste nosce
soprattuttu quannu se riuscia
a ballare li lenti o quannu
certi amici viniane a sunare culle chitarre;
nui nsomma ne ccuntinaune de picca.

E moi?
moi purtroppu,droga,delinquenza,
macchine de grossa cilindrata
e tanti....tanti sordi.
per fortunaci suntu puru
li bravi vagnoni.

(commento personale)

Altri tempi....altre emozioni....bastavano pochi soldi per essere felici.

MILANU

Vinire a Milanu
era ed ete lu sognu
de tutti li giovani.

Iou a diciannove anni
su vinutu a Milanu,
ma no pè visitare la città
ma per lavoru.

Spicciate le scole
cc'era fare a Giurdignanu?
Spittare nu postu,
fare lu vacabondu,
ma quistu nun era possibile.

E cusì iou ca nun era sciutu
cchiù luntanu de lecce me
truvai sperdutu antrà
la nebbia,trammi,semafori e
tanta,tanta gente.

E' bastatu picca però
ca aggiu mparatu tuttu,
puru cu mangiu la polenta,
lu gorgonzola e la cotoletta.

Milanu,nu te offendere
mai tate tante soddisfazioni,
sii na grande città,sacciu
vita e miraculi de tie,ma lu
core meu è a Giurdignanu.

E' veru puru ca se dice:
Milan le un gran Milan,
ma Giurdignanu,le pu se gran.

(commento personale)
L'ultima poesia non è per caso dedicata a Milano in quanto rappresenta una pagina che si chiude(salento)e una pagina che si apre.Ma il Salento resta sempre nel mio cuore pur essendo ormai da 43 anni a Milano.Spero di allungare questa raccolta con la pagina di Milano e degli anni e avvenimenti vissuti.


Un caloroso saluto a tutti

Gioacchino Vilei